UEMAk SIUSS programaren “euskarazko bertsiorik ez edukitzeak euskaraz lan egiteko eskubidea urratzen” duela salatu zuen pasa den uztailean. Nafarroako hainbat udalek gutun bana bidali zioten Nafarroako Gobernuari aipatu programa euskaraz ere eskain zezan eskatzeko. Udazkenean jakinarazi dute Nafarroako Gobernuaren ordezkariek programa euskaratzera bidalita dagoela.

Oro har balorazio positiboa egin badu ere, zer hobeturik ere ikusi du osasun langileen elkarteak II. Euskara Planaren zirriborroan. Beren iritziz “Planaren jarraipen batzorde orokorra zehaztu gabe uztea hutsune handia” da. Gainera, ezinbestekotzat jo dute “euskaldunen bilguneekin lankidetza zintzoan aritzea, UEMArekin, besteak beste.” Eta “planaren aterpean topaleku ofizial bat sortu beharko” litzatekeela uste dute.

Parte hartzaileen balorazio baikorrarekin amaitu dituzte saioak Bergaran. Eta horrela, bost dira jada arnasguneen tailerrak egin dituzten herriak; Orio, Araitz, Markina, Goizueta eta Bergara. Bihar, Zarautzek hartuko du txanda. Gero eta gehiago dira tailerrak egiteko UEMArekin harremanetan jartzen ari diren herriak.

Hizkuntza irizpideak onartu dituzten udalei babesa erakutsi eta EAEn Estatu espainolaren ordezkari den Carlos Urquijoren eta Estatuko abokatuaren jarrera “itxi eta zapaltzailea” salatzeko, mosaiko erraldoia egin du Euskal Herrian Euskaraz-ek Zarauzko hondartzan.