Maren Belastegi UEMAko lehendakaria eta Miren Segurola UEMAko koordinatzailea Mertxe Mujika eta Asier Amondo AEK-ko eta Korrikako arduradunekin elkartu dira, gaur, Azpeitian. UEMAk 19. Korrika babestu nahi izan du, horrela. UEMAko lehendakariak “nabarmendu, goraipatu eta eskertu” nahi izan du euskararen normalizazioa lortzeko AEK-k egiten duen ekarpena.

EHEk 35 urte beteko ditu, ofizialki, heldu den azaroaren 4an. Egun horretan, Durangoko San Agustin Kulturgunean, 19:00etan, mahai beraren bueltan batuko dituzte Euskararen gizarte erakundeen Kontseiluko Idazkari Nagusi Paul Bilbao, Udalerri Euskaldunen Mankomunitateko (UEMA) Maren Belastegi eta Gotzon Barandiaran kulturgilea. Inaki Petxarroman Berriako kazetariak gidatuko du saioa.

UEMAko udal ordezkariek hedabideekiko harremanetan kontutan hartu beharreko hizkuntza irizpideak berraztertu eta euskaraz aritzeko konpromisoa berretsi zuten, irailaren 20an egindako Batzar Nagusian. Erabakiaren ondotik, gaur goizean egin du bilera UEMAk EITBrekin, Mankomunitateko kide diren udalek antolatutako prentsa agerraldiak euskaraz hutsez izango direla jakinarazi eta euskararen arnasguneetan modu berezituan jokatzeko eskatzeko.

Imanol Mugartegi alkateak eta Txema Abarrategi Garabideko koordinatzaileak irudikatu dute bi erakundeen arteko hitzarmena. Hitzarmen horien asmoa da munduko hizkuntza gutxituen biziberritze proiektuak indartzen laguntzeko jarduerak bultzatzea. Berriatuarekin, 7 dira (Zarautz, Ondarroa, Usurbil, Orio, Oiartzun, Otxandio eta Berriatua) Garabiderekin hizkuntza lankidetza hitzarmena sinatu duten UEMAko udalerriak.