Paul Bilbaok, Kontseiluaren idazkari nagusiak, idatzitako iritzi artikulua plazaratu du, gaur, Berria egunkariak. Euskaraldunoi ezartzen dizkiguten oztopoei elkarlanean aurre egiteko deia egin du Bilbaok. "Zalantzarik ez dut denok batera joko bagenu, nahikoa indar izango genukeela oztopo horiei edota horiek baino gogorragoei aurre egiteko." Bide horretan, Donostiako manifestazioaren garrantzia ere azpimarratu du. "Larunbatean lehen urratsa emango dugu, eta oztopo horiei aurre eginez euskaraz biziko garela aldarrikatuko dugu."

Nafarroako euskalgintzaren ordezkaritza zabala bildu da. Besteak beste, agerraldian parte hartu dute Eneka Maiz UEMAko zuzendaritzako kideak eta Garbiñe Elizegi Baztango alkateak. Estatuen zein Nafarroako Gobernuaren aldetik hizkuntza-politikari lotuta jazotako injerentziak salatu dituzte. Bereziki Baztanen gertatutakoa salatu nahi izan dute.

Azken egunetan, argitara eman diren hainbat azterketen inguruan iritzia plazaratu du Maren Belastegi, UEMAko lehendakaraiak. "Bi hitzetan esateko, gunerik erdaldunenetan aurreratu da gehien; euskararen arnasguneetan, berriz, atzerakada gertatu da. Gune erdaldunetan euskararen ezagutzak gora egin du, erabilerak ez horrenbeste. Eremu euskaldunean ezagutza jaitsi egin da, eta erabilera are gehiago."

UEMAko kide diren Aduna, Antzuola, Arama, Bergara, Gaintza, Oiartzun, Oñati, Usurbil, Zarautz eta Zeraingo udal ordezkariak lagun agerraldia egin du Kontseiluak Donostian. Otsailaren 28an Oztopoen gainetik euskaraz biziko gara lelopean egingo den manifestazioa aurkeztu dute. Hizkuntza-politiketan azen aldian Estatuen zein Nafarroako Gobernuaren bidez jasandako injerentziak salatzea eta hainbat administrazioetako arduradunek aurrera egiteko hartu duten determinazioa txalotzea da mobilizazioaren helburua. Gipuzkoa plazatik abiatuko da 17:30ean.