Arnasa gara kanpainaren baitako Euskararen tximeleta efektua bideoari buruz aritu zen atzo solasean Iratxe Urkiaga (Lekeitio, 1988) aktorea, Nagore Arin kazetariarekin, zuzenean, Berria egunkariaren Instagram kontuan.
Aste honetako Euskararen tximeleta efektua bideoan, Graxi Arregi, Sambou Diaby, Mikel Irazusta eta Erika Olaizola aktoreak dira protagonista. Kalean edaten ari dira, lurrean eserita, eskola bateko patioa dirudien lekuren batean. Gazteleraz ari dira batez ere, baina lagunetako batek kontzienteki eusten dio euskarari, eta pixkanaka pixkanaka, gainerako solaskideak euskaraz hitz egiten jartzen ditu. Azken batean, euskarari eusteak duen garrantzia islatzen du bideoak, erdaretarako ohitura dutenak euskarara erakartzeko modua erakutsiz.
Arnasa gara kanpainaren baitan astero zabaltzen ari diren bideoen artean, zenbaitetan aritu da lanean Urkiaga, eta ez zaio erraza egin gustukoena hautatzea. Izan ere, “esketx bakoitzak utzi du bere kutsua, eta zaila da bat hautatzea. Azken batean, beharrezkoa baita esketx bakoitzak bidaltzen duen mezua”.
Euskararen tximeleta efektua bideoa, berriz, errealitatea islatzen duena iruditu zaio. Lekeitiarra da Urkiaga, eta batez ere Lekeitiotik kanpo sentitu da bideoan agertzen den egoera horretan. “Batez ere Bilbo inguruan bizi izan dut. Gertatu izan zait guztiek euskaraz dakiten lagunekin egon, eta pixkana-pixkanaka erdarazko gero eta berba gehiago entzutea. Horrelakoetan, kontzienteki eusten diot euskarari, eta nik egiten ez badut beste lagun bat izaten da jarrera hori hartzen duena. Azkenean, klik egitean datza. Euskarari eustea zer garrantzitsua den ohartzen naiz, baina batzuetan txarto ere sentitu izan naiz euskarari eusteagatik”.
Arnasa gara kanpainaren ardatza diren euskararen arnasguneen garrantzia ere nabarmendu du Urkiagak elkarrizketan. Arnasa gara kanpainaren baitan lan egitean ezagutu zuen kontzeptua dela aipatu du, eta harrezkero badakiela arnasguneak direla euskararen birikak. “Niretzako oso positiboa izan da kanpaina honetan parte hartzea. Sekula ez nuen entzun arnasgune bat zer den. Gerora ohartu naiz, eta niri pertsonalki hausnarketa handia egitera ekarri nau. Ez soilik arnasguneen indarraz eta garrantziaz. Arnasguneak birikak dira, baina oro har euskararen garrantziaz eta euskaldun guztien ekarpenaz ohartzeko balio izan dit”.
Gazteak kontzientziaren beharraz ere hitz egin du, eta gazteen artean edo eskoletan jartzeko Arnasa gara kanpainaren baitako orain arteko lanak zabaldu izan dituela ere adierazi du. Telefonoetarako mezularitza aplikazioetan zein sare sozialetan zabaltzeko bideo eta esketx egokiak direla, eta helarazi nahi diren mezuak zabaltzeko kanpaina modu aproposa dela aipatu du.
Eguneroko hizkuntza ohiturei dagokienez, berriz, Lekeition euskaraz bizi direla eta euskaraz bizi daitekeela adierazi du, baina Lekeitiotik kanpora joatean errealitate hori lausotu egiten dela: “Herritik irtenda, arnasguneetatik irtenda, igartzen da erdaretarako joera”.
Gai honi buruzko informazio osagarria:
· Iratxe Urkiaga: «Herritik irtenda, arnasguneetatik irtenda, igartzen da erdaretarako joera» (berria.eus, 2021-05-05).
