UEMAk etorri berrientzako harrera protokoloa eguneratu du aurten, eta bertako kide diren udalek etorri berrientzako antolatzen dituzten harrera saioetarako eta ikastaroetarako zenbait bideo ere prestatu ditu. Bideoen helburua etorri berriei euskara ikastearen garrantzia ikusaraztea da. Horretarako, Euskal Herrira kanpotik heldu diren eta euskara ikasi duten herritarrak elkarrizketatu ditu UEMAk.

Horien artean, Hondar ahoak telesailean aktoreetako bat den Omar Diop berriatuarra. 14 urterekin heldu zen Euskal Herrira, eta Ondarroako Zubi Zahar ikastolan eta AEKn ikasi zuen euskara. Hona heltzen diren sorterriko lagunentzako argi du mezua: euskara ikastea da Euskal Herrian txertatzeko modurik onena. Bere kasuan, euskara ikasteak ateak zabaldu dizkiola eta aktore izateko bidea ere euskara jakitetik heldu zaiola nabarmendu du pasa den astean emandako elkarrizketa batean.

Hona Omarri ekainean Markina-Xemeinen grabatutako bideoa:

Gai honi buruzko informazio osagarria:
· Omar Diop: “Hizkuntza da biderik onena hemen integratzeko” (Lea-Artibai eta Mutrikuko Hitza, 2020-11-19).
· Euskara, txertaketa onaren adierazle (Berria, 2020-11-25).