Leitzako Kaxkabeltza merkatari elkarteak herriko merkataritza sustatzeko eta merkataritzan euskara ere kontuan hartzeko kanpaina abiarazi du gaur, UEMAren eta Nafarroako Gobernuaren laguntzarekin. Bi aste iraungo da kanpainak, eta herriko dendetan erostea herriari bizirik eusteko eta herria garatzeko zein garrantzitsua den nabarmendu nahi dute. Merkataritza euskalduntzeko UEMAren ildoaren bat egiten duenez kanpainak, UEMAren laguntza ere izan du Kaxkabeltza elkarteak. Era berean, udalerri euskaldunen garapenarekin lotutako ekimenen baitan ere kokatu du UEMAk kanpaina hau, udalerri euskaldunak garatzea arnasguneen izaerari eusteko ezinbestekoa delakoan.