2017ko errenta eta ondarea aitortzeko garaia heldu zaie Araba, Bizkaia, Gipuzkoa eta Nafarroako herritarrei, eta Udalerri Euskaldunen Mankomunitateak, bertako kide diren udalekin elkarlanean, errenta aitorpena euskaraz egiteko kanpaina jarri du abian aurten ere. Iaz bezala, eta gaur egun herritarren gehiengo handi batek autolikidazio proposamena jasotzen duela kontuan hartuta, berariaz horri eman zaio aurten ere garrantzia.
Azken urteotan bezala, errenta aitorpena euskaraz egiteko kanpainarekin, herritarrek administrazioarekin dituzten harremanak euskarazkoak izan daitezen bultzatu nahi dute UEMAk, udalek eta beste hainbat erakunde publikok. Izan ere, errenta aitorpena euskaraz eginda, administrazioaren euskalduntzea ere bultzatzen da.
Ohi bezala, errenta aitorpena egiterakoan, herritarrek hainbat bide dituzte euskaraz egiteko, modu errazean: hasieratik, zein hizkuntzatan egin nahi duten aukera dezakete, eta euskaraz egiteko ez dago aparteko zailtasunik.
Administrazioa euskalduntzeko duen eraginagatik, euskararen normalizaziorako bidean udalerri euskaldunak egiten ari diren beste urrats bat da errenta aitorpena ahalik eta herritar gehienek euskaraz egitea. Urratsa sendoa izan dadin, ordea, herritarren babesa eta parte-hartzea beharrezkoa da, eta hautu horretan eragin nahi du aurten ere kanpainak, euskarak dagokion lekua izan dezan administrazio publikoan ere.
Errenta aitorpena egiteko hainbat modu daude, eta lurralde bakoitzeko foru ogasunaren arabera webguneak, telefonoak eta gainerakoak aldatzen diren arren, moduak antzekoak dira kasu guztietan, eta horietan euskararen aldeko hautua egitea da kanpaina honekin lortu nahi dena. Batetik “datuetan ere islatu dadin udalerri euskaldunetan euskaraz bizi garela”, eta bestetik “administrazioa euskalduntzeko bidean eragiten jarraitzeko”.
Kanpainarako material grafikoa, udalen, erakunde publikoen eta euskara talde edo elkarteen eskura jarri du UEMAk.
Hemen ikusi eta eskuratu daitezke kartelak, euskarriak, irudiak eta gainerako azalpen-orriak:
· Errenta aitorpena euskaraz (2018ko kanpainarako materiala).
Tartean daude errenta aitorpena egin daitekeen lekuetan jartzeko euskarriak ere, udalen webguneetarako gif animatuarekin batera.
Gai honi buruzko informazio osagarria:
· Gipuzkoa. 2017ko errenta eta aberastasuna aitortzeko kanpaina: datak eta gainerakoak (gipuzkoa.eus).
· Bizkaia. 2017ko errenta eta ondare kanpaina: informazio guztia (bizkaia.eus).
· Araba. Errenta 17. Proposamenak, informazioa eta galdera ohikoenak (araba.eus).
· Nafarroa.
· Errenta aitorpena euskaraz egiteko deia (bizkaie.eus, 2018-04-06).
· Errenta aitorpena euskaraz tramitatzeko deia (noaua.eus, 2018-04-09).
· Errenta aitorpena euskaraz egiteko dei egin dute UEMAk eta udalek (ataria.eus, 2018-04-10).
· Errenta aitorpena euskaraz egiteko kanpaina abiarazi du UEMAk, udalekin eta erakunde publikoekin elkarlanean (Urola Kostako Hitza, 2018-04-10).
· Errenta aitorpena euskaraz be egin daiteke (aramaio.eus, 2018-04-12).
· Errenta aitorpena euskaraz egiteko gonbitea egin dute Zumaiako Udalak eta UEMAk (baleike.eus, 2018-04-12).
· Euskararen aitorpenean Goierrin saldo negatiboa (Goierriko Hitza, 2018-04-11).
· Bermeoko Udalak errenta aitorpena euskaraz egitea sustatzeko konpromisoa hartu du (Busturialdeko Hitza, 2018-05-09).
· Josu Labaka: “Euskara kontuetan ez dago autolikidaziorik. Behin eta berriro hautu kontzientea egin behar dugu”.
