UEMAren hezkuntza proiektuak eskolatik kanpo ere egingo du bidea udazken honetan. Hezkuntza ez arautuan ere eragin nahian, Salto! Gazte Topaketak antolatu ditu UEMAk, gazteak euskal hiztun gisa sentsibilizatu, kontzientziatu, aktibatu eta ahalduntzeko. Euskaraz bizitzea eta euskararen arnasa zabaltzeko agente bilakatzea sustatu nahi da. Gaiak duen garrantzia nabarmenduz, Eusko Jaurlaritzaren Hizkuntza Politikarako sailburuordetzak berariaz lagundu du ekimena. 

Udalak euskaldundu arren udalerriak erdalduntzen ari direla ohartuta, herritarren kontzientziazioa eta sentsibilizazioa da UEMAren ildo nagusietako bat azken urteotan. Horren baitan, euskararen arnasguneei buruzko hezkuntza proiektua sortu zuen UEMAk duela bi urte, eta amaitu berri den ikasturtean UEMAko herrietako ikastetxe guztietan aritu dira lanean UEMAko teknikariak, Haur Hezkun-tzako, DBHko eta Batxilergoko ikasleekin. Ikasleen artean hizkuntza ekologiaren diskurtsoa zabaltzea eta arnasguneen garrantzia nabarmentzea da proiektuaren helburua, gazteei normalizazio prozesuan duten garrantzia ikusarazteaz gain.

Proiektua bere osotasunean garatzeko, eta hezkuntza arautuaren mugak gainditu nahian, Salto! Gazte Topaketak antolatu ditu aurten lehen aldiz UEMAk. Urriaren 20tik 22ra izango dira, Orioko Itxaspe baserrian, eta udalerri euskaldunetako gazteek elkar ezagutzea eta beraien artean euskara oinarri hartuta saretzea da asmoa. 15 eta 18 urte arteko gazteak bilduko dira topaketetan, eta hiru egunetan hainbat ekimen eta ekitalditan hartuko dute parte lagunartean, begirale eta sukaldariekin batera.

Azken batean, euskaraz bizi diren gazteek inertziatik kontzientziarako saltoa ematea eta horrekin efektu biderkatzailea sortzea da helburuetako bat, euskararen lurgunea hedatzen jarraitzeko. Aisialdiarekin eta euskal kulturarekin lotutako egitarau erakargarriarekin, gazteak gaiaren inguruan sentsibilizatuta, ahalduntze kolektiborako urratsa eman nahi da topaketa hauekin. Maddi Gallastegi UEMAko hezkuntza teknikaria izango da topaketen koordinatzailea.

Gazteen artean euskararen ezagutzak gora egin arren erabileran eta kontzientziazioan eragitea oraindik ere ezinbestekoa dela iritzita, Eusko Jaurlaritzaren Hizkuntza Politikarako sailburuordetzak berariaz lagundu du ekimen hau.

Topaketei buruzko informazio osagarria, PDF honetan:
· Salto-diptikoak

Topaketan parte hartzeko, berriz, ezinbestekoa da izena ematea.
Horretarako, honakoak dira bideak:

• UEMAren sare sozialetan gurekin harremanetan jarrita: @uema_eus
• Telefonoz: 943 816699.
• Azpiko datuak bete eta hona bidalita:
> UEMA · Enparan kalea 1, 2a ·
20730 Azpeitia, Gpuzkoa
> hezkuntza@uema.eus

Beti ere, honako datuak betetzea beharrezkoa izango da:

· Izen-abizenak:
· Helbidea:
· Herria:
· PK:
· Jaioteguna:
· Kontakturako telefonoa:
· E-posta:

Epea: urriaren 9a
Prezioa: 30 euro
Taldearen osaketa: lagun kopurua gainditzen bada, lurraldetasuna, genero irizpidea, eta izena eman dutenen ordena hartuko da kontuan taldea osatzeko.

EUSKARAREN ARNASGUNEEI BURUZKO HEZKUNTZA PROIEKTUA: orain arteko kronologia laburra.

· 2015ean ikerketa abiarazi zuen UEMAk, udalerri euskaldunetako ikasleek eta irakasleek euskararen eta soziolinguistika edukien inguruan zer-nolako pertzepzioa duten aztertu nahian. Emaitzak bildu eta aztertu zituen.

· Ikerketaren emaitzetatik abiatuz, arnasguneen hezkuntza proiektua sortu zen. DBHko 3. eta 4. mailetarako unitate didaktikoak eta jarduerak landu eta aurkeztu ziren, hezkuntzako eragileekin eta udaletako euskara teknikariekin elkarlanean. Ordudanik, herriz herri irakasleei formazioa eta materiala eman zaie, eskoletan landu dezaten gaia. Batxilergoan, berriz, tailer formatua hartu du egitasmoak. 3 orduko tailerra jasotzen du gela bakoitzak, ordu eta erdiko 2 saiotan banatuta. UEMAko teknikariek ematen dute, ikasgelan.

· Haur Hezkuntzan, ikastetxe bakoitzari proiektua aurkeztu ondoren, gida didaktikoa eta material osagarria zabaldu zuen iaz UEMAk, Katxiporreta kooperatibarekin elkarlanean. Miren Amurizak idatzitako euskarari buruzko lau ipuin dira gaia lantzeko oinarria. Pirritx, Porrotx, Marimotots eta Pupu eta Lore dituzte protagonista liburuek, eta euskarari buruzko alor ezberdinak

· Lehen Hezkuntzari dagokionez, 2017-2018 ikasturte hasierarako izango dira prest unitate didaktikoak. Lau saiotan garatuko dira. LH 4. mailarako unitate bat eta LH 6. mailarako beste bat izango dira, eta bakoitzak lau jarduera izango ditu.

Gai honi buruzko informazio osagarria:

· Euskaran ahalduntzera saltoa (Gipuzkoako Hitza, 2017-09-15).
· Salto! Gazte Topaketak egingo ditu UEMAk Orion (Urola Kostako Hitza, 2017-09-08).
· Udalerri euskaldunetako gazteek Orion ezagutuko dute elkar (Argia, 2017-09-08).
· Salto! Gazte Topaketak egingo ditu UEMAk, Orion (karkara.eus, 2017-09-08).
· Udalerri euskaldunetako gazteen topaketak egingo dituzte urriaren 20tik 22ra, Orion (uztarria.eus, 2017-09-11).
· Salto! Udalerri euskaldunetako gazte topaketak (usurbil.eus, 2017-09-15).

· UEMAren hezkuntza proiektua: udalerri euskaldunetarako ekarpen berria eta iraunkorra (uema.eus, 2016-04-13).

· Soziolinguistika ikasgeletan txertatuz (Urola Kostako Hitza, 2016-04-15).
· UEMAren hezkuntza proiektua, esperimentaziotik harago (zarauzkohitza.eus, 2016-04-13).
· UEMAren hezkuntza proiektua, udalerri euskaldunetarako ekarpen barria eta iraunkorra (bizkaie.eus, 2016-04-15).