Maiatzean egin zion UEMAk EHUri udako ikastaroetan euskarazko eskaintza igotzeko eskaria. Udalerri euskaldunetako biztanleek hainbat zerbitzu herriz kanpo jaso behar izaten dituzte, unibertsitatea da zerbitzu horietako bat, eta horrek arnasguneetako herritarrengan eragin zuzena du. UEMAren arabera “arnasguneak indartze bidean oztopoa da EHUren udako eskaintza”. EHUk emandako erantzunean aipatu du euskarazko ikastaroen eskaintza handitzeko lanean jarraituko dutela.

Zumaiako anbulatorioan euskaraz ez dakiten mediku eta pediatra bana jarri zituen Osakidetzak. Egoera horren aurrean, guraso talde batek sinadurak bildu zituen. Zumaiako Udala bere aldetik, Osakidetzarekin harremanetan jarri zen afera konpontzeko eskaria luzatzeko. Osakidetzak egoera konpondu du, mediku eta pediatra euskaldunak ekarri ditu.

Sortu berria da euskara taldea Azpeitian, “Natul” izango da taldearen izena eta izen-abizenak euskalduntzeko kanpaina da egingo duten lehen ekimena. Postua jarriko dute igerileku aurrean, datorren asteartean eta ostegunean, 17:00etatik 20:00etara. Euria egiten badu, plazako arkupeetan egongo dira. Herritarren egiteko bakarra nortasun agiria eta familia liburua hara eramatea izango da, gainontzekoa euskara taldeak bideratuko du.

Iñigo Fernandezek Orioko Curriculuma Sortzen elkartearen ekaineko ekitaldirako idatzitako testua argitaratu du Karkara webgunean. Orioz, arnasguneez eta euskaldun kontzienteen inguruan hausnarketa interesgarriak egin ditu Fernandezek.