Arabako udalerri euskaldunena da Aramaio. Bertako biztanleen %90 inguruk daki euskaraz, eta egunerokoan, nagusiki euskaraz bizi dira bertako herritarrak. Gaur egun, mediku euskalduna daukate, eta uda partean egungo medikua ordezkatuko duen langilea ere hala izan dadin eskatu dute, bat eginda.

Pasa den larunbatean ospatu zen, Tolosan, Udalerri Euskaldunen Eguna, lehen aldiz. Festa giroa gailendu zen egunaren hasieratik eta arrakastaz gauzatu zen aurreikusitako egitaraua. Euskararen arnasguneak sendotzeko aldarrikapena, umorea eta festa uztartu zituzten parte hartu zutenek.

Hainbat udalerritako alkate eta zinegotzik babestuta, Ibai Iriarte Tolosako alkateak eta Garbine Elizegi Baztango alkateak irakurri dute udalerri euskaldunetako hautetsiek adostutako adierazpen bateratua. Maren Belastegik, UEMAko lehendakariak, bere aldetik, euskararen arnasguneak indartu nahi dituztenekin elkarlanean aritzeko borondatea agertu du.

UEMAk Batzar Nagusia egingo du, ekainaren 14an, Tolosako Udalean. Eta bertan, Berastegi eta Markina-Xemeingo udalek ala eskatuta, Batzar Nagusiak UEMAko kide izatea onartuko die bi udalerriei. Gipuzkoa eta Bizkaiko udalerriokin UEMAk hego Euskal Herriko 72 udalerri euskaldun bilduko ditu bere baitan.