Lea Artibai da Euskal Herriko eskualderik euskaldunena. 5.000 biztanletik gora dituzten herrien artean berriz, Azpeitian erabiltzen da gehien euskara. Telebistako saioak, herri euskaldunetan euskararen erabilerari dagokion argazkia jaso du. Eta arnasguneen inguruan egindako azterketa guztiek erakutsi duten moduan, ikusi da euskararen arnasguneetan atzeraldia gertatzen ari dela. Maren Belastegi, UEMAko lehendakariak, arnasguneak sendotzeko hizkuntza politika aurrerakoiak bultzatu beharra azpimarratu du.

"Tribuaren Berbak" gaur gauean emitituko da, 22:15etik aurrera, ETB1en. Munduko herririk euskaldunenak deituriko programan euskararen arnasguneak izango dituzte aztergai. Eta besteak beste, Jon Aizpuru Hizkuntza Politikarako Sailburuordetzako kidea, Xabier Bengoetxea euskara teknikaria eta Maren Belastegi UEMAko lehendakariak gaiaren inguruan duten ikuspegiaren berri emango du saioak.

Rikardo Uzkudunek iritzi artikulu interesgarria argitaratu du Karkara webguneko Euskaraz bizi bizi blogean. Euskararen ezagutza, erabilera, motibazioa eta arnasguneen gaineko hausnarketak plazaratuta, etorkizuneko Orio irudikatzen ere ausartu da Uzkudun.

Lagunarteko erabileran euskara geroago eta gutxiago erabiltzen dela ikusita, egoerari aurre egiteko aktibatu dira 60 bat lekeitiar. Argia Lekeition izan da, eta herritarrak euskara erabilera sustatzeko egiten ari diren ahaleginaren berri eman du maiatzeko aldizkarian.